Blog Posts

Umræðufundur fyrir foreldra grunnskólabarna

2/2/2018

Á fimmtudaginn 8. Febrúar 2018, klukkan 20:00, stendur foreldrafélag Auðarskóla fyrir umræðufundi fyrir foreldra grunnskólabarna.

Þetta er í þriðja skiptið sem foreldrafélagið stendur fyrir svona fundi og hefur fólk verið ánægt með fyrirkomulag þeirra. Á fundinum er rætt um skipulag skólastarfsins, bæði um það sem vel er gert og einnig það sem hugsanlega mætti betur fara.

Nauðsynlegt er að skrá sig á fundinn, fyrir hádegi þann 8. febrúar. Lágmark 15 manns verða að skrá sig til að fundurinn verði haldinn.

Fundurinn verður haldinn í efri byggingu grunnskólans. Skráningar hjá Jónínu á jonina@audarskoli.is eða á facebook.

Kaffi, kakó og kex í boði.

Aðalnúmer skólans misvirkt

29/1/2018

Aðalnúmer skólans 430-4757 dettur inn og út og því ekki alltaf hægt að hringja í það. Það dettur út mislengi hverju sinni og er inni mislengi.

Ef þið náið ekki í aðalnúmerið er hægt að reyna að ná í númer aðstoðarskólastjóra, Kela, 430-4754.
Eins er hægt að senda tölvupóst á jonina@audarskóli.is ef erfitt reynist að ná inn í skólann.

Fyrir leikskólann ætti að vera hægt að hringja í 430-4711 eða inn á deildirnar 4712 á Tröllaklett og 4713 á Dvergahlíð.

Bóndadagskaffi í leikskólanum

22/1/2018

Á föstudaginn 19. janúar síðast liðinn var haldið upp á bóndadaginn í leikskólanum. Karlmennirnir í lífi barnanna fjölmenntu og boðið var upp á kaffi og með´í. Að sjálfsögðu var þorramatur líka á boðstólum; súrir hrútspungar, sviðasulta, hákarl, harðfiskur og flatkökur með hangikjöti. Einnig var farið í nokkra gamla leiki eins og fuglafit, völuspá, störu og hoppa yfir sauðalegg. Börnin bjuggu til kórónur sem voru skreyttar blómum. Fjöldi blóma á kórónu táknar fjölda barna sem viðkomandi er tengdur.

Við þökkum kærlega fyrir góða stund og öllum fyrir komuna.

Nýtt skóladagatal grunnskóladeildarinnar

15/1/2018

Nýtt skóladagatal grunnskóladeildar er nú komið hér inn á vefinn.

Nýjum skipulagsdegi hefur verið bætt inn á dagatalið þann 20. febrúar en það er dagur sem vantaði inn á dagatalið í upphafi skólaársins.

Uppfært dagatal má nálgast hér fyrir neðan og undir "grunnskóli" og "skóladagatal"

Skóladagatal 2017-2018
File Size:	53 kb
File Type:	xls

Download File

Forseti Íslands í Auðarskóla

8/12/2017

Guðni Th. Jóhannesson, forseti Íslands, og kona hans, Eliza Reid, ásamt fylgdarliði, komu í opinbera heimsókn í Dalina 6. og 7. desember 2017.

Þau byrjuðu heimsóknina á hjúkrunarheimilinu Fellsenda um þrjúleitið miðvikudaginn 6. desember. Þaðan fóru þau svo að Erpsstöðum þar sem þau fræddust um starfsemina þar og því næst kynntu þau sér ostagerðina í MS í Búðardal. Að þessu loknu var opinn fundur í Leifsbúð um framtíð ferðaþjónustu í Dölum. Kynnt voru áform um uppbyggingu í Ólafsdal, Vínlandssetur og söguhringurinn um Fellsströnd og Skarðsströnd. Í lok kynninganna var gestum boðið upp á kaffiveitingar. Forsetahjónin enduðu svo fyrri dag heimsóknar sinnar á Byggðasafni Dalamanna á Laugum þar sem Valdís Einarsdóttir safnvörður tók á móti þeim.

Fimmtudaginn 7. desember byrjuðu forsetahjónin á ferð fyrir strandir eins og við heimamenn köllum það en það er hringurinn sem er farið að tala um sem "Gullna söguhringinn", hringurinn fyrir Fellsströnd, Skarðströnd og um Svínadalinn.

Um 11:40 mættu þau svo í Auðarskóla. Þau byrjuðu á leikskólanum þar sem þau heilsuðu leikskólabörnum. Fyrst fór hann og kíkti á litlu krílin á Dvergahlíð þar sem þau störðu á hann stórum augum. Svo kíkti hann inn í söngstund með eldri börnum á Tröllakletti og hlustaði á nokkur lög sem börnin sungu fyrir hann og tók svo lagið með þeim.

Klukkan 12:00 fóru svo nokkrir fulltrúar nemendaráðsins og sóttu forsetann og fylgdarlið út á leikskóla og fylgdu þeim yfir í grunnskólann. Þar tóku við þeim aðrir fulltrúar nemendaráðs sem fylgdu þeim inn í kennararýmið þar sem hann heilsaði nokkrum starfsmönnum. Því næst var þeim fylgt inn í stofur þar sem nemendur skólans biðu spenntir eftir að hitta forsetann og heilsuðu þau hjónin flestum með handabandi. Byrjað var í neðri byggingu skólans þar sem hann fór inn í þrjár stofur yngsta stigs og eina stofu miðstigs. Þegar komið var upp ganginn inn í efri byggingu skólans voru enn aðrir fulltrúar nemendaráðs sem tóku á móti honum og fylgdu þeim inn í aðra stofu miðstigs og svo voru allir unglingarnir saman í einni stofu. Nemendur elsta stigs sýndu líka stóru stundatöfluna í salnum og útskýrðu fyrir þeim hvernig stundataflan þeirra virkar, hvernig hún hefur fasta tíma og svo síbreytilega tíma með síbreytilegum hópum.

Heimsókn forsetans í Auðarskóla lauk svo með því að honum og fylgdarliði hans ásamt nemendum og starfsfólki var boðið í íslenska kjötsúpu í Dalabúð. Nemendur voru ánægðir með heimsókn forsetans og brosið skein úr andlitum þeirra meðan á heimsókninni stóð.

Eftir heimsóknina í Auðarskóla fóru forsetinn og fylgdarlið að Eiríksstöðum og kynntu sér ferðir Dalamannsins Leifs heppna og því næst fóru þau að Kvennabrekku þar sem Guðni sjálfur afhjúpaði skilti um Árna Magnússon fræðimann og handritasafnara. Þá fóru þau að Kringlu að skoða sauðfjárbúið hjá ungu bændunum þar. Síðasta heimsóknin í þessari ferð var svo til eldriborgara á Silfurtúni.

Í lok dags var svo fjölskylduskemmtun í Dalabúð þar sem öllum íbúum gafst kostur á að hitta forsetahjónin ásamt því að sjá skemmtiatriði sem hinir ýmsu heimamenn, þar á meðal nemendur Auðarskóla, skemmtu gestum. Að lokum tóku allir lagið "Hátíðarskap" og gæddu sér svo á hinum ýmsu afurðum úr Dölum.

Jólaföndur foreldrafélagsins

5/12/2017

Svipað snið verður á föndri og í fyrra þar sem
fólki gefst kostur á að kaupa föndurpakka.

Kaffihúsakvöld 2017

28/11/2017

Fimmtudaginn 30. nóvember verður hið árlega kaffihúsakvöld í Dalabúð.

Húsið opnar 19:00 en skemmtunin byrjar 19:30.

Boðið verður upp á smákökur og heitt kakó.
Nemendur úr 6. - 10. bekk sýna skemmtileg atriði.
Einnig verður happadrætti með glæsilegum vinningum.

Það kostar 1.000 kr. inn á kaffihúsakvöldið og innifalinn er einn happadrættismiði.

Frítt er fyrir nemendur skólans og börn undir skólaaldri.

Hægt er að kaupa fleiri happadrættismiða, hver miði kostar 100 kr.

Ágóði rennur til nemendafélagsins.

Starfsáætlun Auðarskóla 2017-2018

27/11/2017

Starfsáætlun Auðarskóla fyrir skólaárið 2017-2018 er komin hér inn á vefinn undir "útgáfa" og "starfsáætlanir".

Dagur eldri borgara

16/11/2017

Kæru Dalamenn 60 ára og eldri

Verið velkomin í leikskólann okkar þriðjudaginn 21. nóvember.
Það verður opið hús milli kl. 10 og 11
í tilefni af degi eldri borgara.
Boðið verður upp á hressingu,
við tökum kannski lagið saman
og eigum góða samverustund.

Hlökkum til að sjá ykkur

Börn og starfsfólk leikskóla Auðarskóla

Tæknimessa á Akranesi

13/11/2017

Á fimmtudaginn 9. nóvember s.l. fóru nemendur á elsta stigi Auðarskóla í ferð á Akranes til að taka þátt í Tæknimessu sem haldin var í fjölbrautaskólanum þar. Það var líf og fjör í fjölbrautaskólanum þann daginn en þetta var í annað skiptið sem Tæknimessan var haldin í skólanum.
Um 650 ungmenni af elsta stigi grunnskólanna á Vesturlandi tóku þátt.

Markmið með Tæknimessu er að kynna það námsframboð sem í boði er í Fjölbrautaskóla Vesturlands á sviði iðn- og verkgreina og hvaða tækifæri eru til atvinnu hjá iðn- og tæknifyrirtækjum í landshlutanum. Fjölmörg fyrirtæki komu og kynntu starfsemi sína og hvers konar störf þau geta boðið.

Okkar nemendur skoðuðu og kynntust hinum ýmsu iðngreinum ásamt því að fara í ratleik. Eftir hádegismat í fjölbrautaskólanum var svo ferðinni heitið í stutta bátsferð og kynningu á véltækninámi um borð í ferjunni Akranesi.
Í lokin var svo stefnan að fara í kynnisferð í hátæknifyrirtækið "Skaginn 3x" en vegna seinkunnar verður það að bíða betri tíma.

Nemendur skemmtu sér konunglega í þessari flottu ferð og fræddust um margt áhugavert.

Samtök sveitarfélaga á Vesturlandi styðja verkefnið í gegnum Sóknaráætlun.
Til að fræðast nánar um tæknimessuna má skoða upplýsingar um viðburðinn á facebook síðu FVA:
FVA - Fjölbrautaskóli Vesturlands Akranesi