Árshátíð Auðarskóla fór fram í gær.  Foreldrar og vandamenn fylltu Dalabúð.  Nemendur stóðu sig með stakri prýði á sviði sem og við aðstoð í sal.  Foreldrar sáu um glæsilegar veitingar.  Flest starfsfólk grunnskóladeildar var við störf og stýrði athöfninni eins og best gerist.  Hér er öllum aðilum Auðarskóla þakkað fyrir góða árshátíð.

Myndir frá því í gær komnar í myndasafn skólans.  Sjá hér.

Ágætu foreldrar

Þann 29. mars næstkomandi verður haldin árshátíð nemenda Auðarskóla í Búðardal. Árshátíðin verður í Dalabúð og hefst kl. 18.00. Áætlað er að dagskrá og kaffiveitingar taki um tvær og hálfa klukkustund. Diskótek verður svo til kl. 23.00 fyrir þá sem vilja.

Þennan sama dag verður heimakstri nemenda flýtt um klukkustund og fara skólabílar frá Búðardal kl. 14.00. Yngri nemendur (1. – 5. bekkur) hefja dagskrána og nauðsynlegt að þeir séu mættir aftur kl. 17.30 í Dalabúð til undirbúnings.

Kaffiveitingar eru að lokinni skemmtun og eru þær eins og áður í boði foreldra. Foreldrar eru því góðfúslega beðnir að hafa meðferðis bakkelsi en starfsfólk í Dalabúð tekur á móti því frá kl. 17.30.  Miðaverð verður það sama og á síðasta ári eða kr. 600 á mann fyrir 6 ára og eldri. Nemendur fá frítt.

Það er von undirritaðs að sem flestir sjái sér fært að mæta og skemmta sér með nemendum á þessari stærstu hátíð skólans.

 Með bestu kveðju

 Eyjólfur Sturlaugsson
skólastjóri

Leikskóla Auðarskóla veittist sú óvænta ánægja að fá brúðusýningu um Gilitrutt.  Brúðusýningin, sem var á vegum Brúðuheima í Borgarnesi, tók um 40 mínútur í fluttningi.  Börnin úr fyrsta og öðrum bekk komu úr grunnskólanum kom yfir í leikskólann til að njóta sýningarinnar.  Sýningin var stórkostlega vel heppnuð og eins og myndirnar sýna náði Bernt, sýningarstjórinn, að fanga athygli  barnanna allan tímann.  Og auðvitað heilsuðu aðalbrúðuleikarar sýningarinnar upp á börnin.
Smellið á myndirnar til að stækka þær.

Í dag var eldriborgurum  boðið í kaffi í leikskólann.  Það var mjög ánægjulegt að sjá hve margir  sáu sér fært að heimsækja  leikskólann. Það er alltaf gaman að fá góða gesti, sem gefa sér tíma til að staldra við, fá sér kaffidreitil og spjalla.

Innilegar þakkir fyrir innlitið

Skólaþing Auðarskóla verður laugardaginn 24. mars 2012 í Dalabúð kl. 10:00 
Tilgangur þingsins er að auka samræðu í samfélaginu um skólamál, efla skólastarf og afla upplýsinga sem nýtast í starfi skólans og stefnumótun sveitarfélagsins. Foreldrar sérstaklega hvattir til að mæta. 
Þingið er öllum opið sem áhuga hafa á skólamálum í sveitarfélaginu.
Vikuna fyrir þingið munu nemendur í eldri bekkjardeildum skólans þinga og verða niðurstöður þeirra birtar á þinginu.

Þinginu stýrir Bryndísi Ásta Böðvarsdóttir ráðgjafi.   Dagskrá hér.

Nú á dögunum birtustu fulltrúar frá kvenfélaginu Þorgerði með gjafir handa leikskólanum.  Félagið gaf tvær brauðristar, eina á hvora deild.   Leikskólinn þakkar kvenfélaginu fyrir gjafirnar og sýndan hlýhug í garð starfsins.